برشنك صرف ايليك تا كه معاش ايده بيله سز بعده ديوان پادشاهى طرفندن اولرو محله‌لر و بازارلر و غسس‌خانه‌لر و دكانلر غايت لطيف ترتيب ايله طرح ايدوب بنا ايدرلر شويله كه بر كمسه اول شهرك قيوسندن كيروب بالاسنه كتسه محله‌لرى و خانه‌لرى و ديوانخانه‌لرى كزوب كمال ترتيبندن صايمغه قادر اولور زيرا غايتده هندسه اوزره بنا ايتمشلر در و اول شهر يا حصار ايچونكه نقدر بيك‌خانه در اكاكوره هر شهردن و جميع اهل صنعتدن شهرك وسعنه كوره ادم تعيين اولنوب و هر شهرك قرب و بعدنه كوره شهرلرندن چيقوب شهر جديده عزيمتلرينه و بركونده جمله‌سى بردن اول محله و اصل اولمالرى امر اولنور و اولكونده جميع تعيين اولنان خلايق بريرده جمع اولوب جمله بردن شهر مذكوره داخل اولورلر و شهر خالى ايكن مالامال اولوب و هر كيمكه كرك امتعه و اقمشه دن و سائر لوازماتدن مطلوبى اولور ايسه اولكون شهرك دكانلرنده موجود اولور بعده چون خلق‌انده موجود اولوب محله‌لر و اولرو دكانلره قرار ايده‌لر اولرى و دكانلرى پادشاه جانبندن انلره اهون بها ايله فروخت اولنور وانلر كه صاتون المغه قدرتلرى يوقدر ترحم اولنوب انلره اوجوزكرا ايله ويررلر زيرا شهر و ايچنده اولان اولر و بازارلر و دكانلر و كاربان سرايلر پادشاه جانبندن عمارت اولنمشدر و هر دروازه نك بالاسنده عظيم كوملر و چاكلر وضع اولنمشدر و پاسبانلر مؤكل اولوب اخشامدن صباحه قدر نوبت ايله پاسبانلردن اونر نفر متصل چاكلرى چاله زق حراست ايدرلر و بشنجى نوبتده صباح اولور و هيچ برير يوقدر كه پاسباندن خالى اوله و هر شهر و حصارك ديوانخانهء پادشاهيلرى وسعت و قسمتده اوتوره حق واليلرك منصب و پايه‌لرينه كوره پادشاه جانبندن كندى و خدمتكارلرى ساكن اوله حق قدر خانه‌لر بنا و انشا اولنوب علوفه و غله‌لرى دخى جانب خاقانيدن تعيين اولنور و ضبط و ربط امرنده مراسمنده مرسوم اولنديغى وجه اوزره حراست مملكت و ضوابط اموال و سائر رعايا و براياى رعايتده اهتمام مالا كلام ايدرلر و خاقان خطاييدن سير و شكار و مجلس شرب مختارلرى اولميوب همان هنگام طعامده برايكى پياله تجرع ايدرلر زيرا قانونلرنده مست لا يعقل اولمق كناه عظيمدر و ضبط مهماتده شويله ترسان و لرزاندرلر كه مبادا خدمتلرنده بر قصور و غفلت واقع اولوب ناكاه بر حال ايله منصبلرندن عزل اوله‌لر زيرا عزل ايله خلاص اولميوب